ԲԵՄԸ ՄԻ ՎԱՅՐ Է, ՈՐՏԵՂ ԱՆՆՊԱՏԱԿ ՀԱՅՏՆՎԵԼ ՉԻ ԿԱՐԵԼԻ

Մասնագիտությամբ դերասան, բայց նաև երգիչ ու հաղորդավար Արսեն Գրիգորյանը բավականին հետաքրքիր անձնավորություն է: Մեր կողմից նրան ուղղված հարցերին Արսենը տալիս էր փիլիսոփայական, ինչ-որ տեղ էլ խուսափողական պատասխաններ: Բայց, այնուամենայնիվ, մեզ հաջողվեց որոշ բաններ պարզել Արսեն Գրիգորյանի  մասին:

Ինչո՞ւ է մարդն աշխարհ գալիս. կոնկերտ առաքելությամբ, իրեն տրված ծրագրերը իրագործելո՞ւ ,թե՞ ազատ է անել ամեն բան իր մտքի ու խղճի թելադրանքով:

-Յուրաքանչյուր մարդ  պետք է հասկանա`ինչու է ծնվել, եկել աշխարհ: Այս կյանքը իմաստավորվում է այն ժամանակ, երբ Աստծո հետ հաշտվում ես:

Արսե´ն, քեզ հաջողվե՞լ է բացահայտել երջանկության գաղտնիքը:

-Երբ երջանիկ եմ, այդ ժամանակ ինձ թվում է` բացահայտել եմ:Երբ, եթե կարելի է ասել, « դժբախտ» եմ` հասկանում եմ, որ բոլորովին չեմ բացահայտել: Համենայնդեպս, ինձ համար կյանքը հետաքրքիր է իր բոլոր վայրիվերումներով:

Քո աշխատանքը կապված է բեմի հետ: Ի՞նչ է քեզ համար բեմը:

-Բեմը մի վայր է, որտեղ աննպատակ հայտնվել չի կարելի:

Սովոբար ասում են, թե դերասանները կյանքում էլ են դերասան, դու ինչպիսի՞ն ես առօրյա կյանքում:

-Չեմ կարծում, որ լինի մի դերասան, որ այնքան արժեզրկի իր մասնագիտությունը, որ կյանքում էլ դերասանություն անի. ես գնահատում եմ իմ մասնագիտությունը:

Ո՞րն  է հեշտ.դրակա՞ն,թ՞ե բացասական դերեր մարմնավորելը:

-Դերասանի մասնագիտությունը բոլորովին հեշտ չէ: Դու գործ ունես մարդկային տարբեր տեսակների, խառնվածքի, հոգեբանության տեր անհատականությունների հետ: Դա ներքին աշխատանք է, և, ամենևին, դյուրին չէ որևէ կերպար մարմնավորել` անկախ  նրանից դրական, թե բացասական դերեր են:

Քո  կերտած կերպարներից կա՞ մեկը, որը բացահայտում է հենց քո էությունը:

-Այնպես է ստացվել, որ իմ մարմնավորված կերպարները շատ հեռու են իմ մարդկային տեսակից, հետևաբար չկա այդպիսի մեկը, որը բացահայտի իմ էությունը:

Ո՞րն է քո ամենասիրած դերը, որ երբևէ խաղացել ես:

- Դժվար է առանձնացնել որևէ կերպար, սակայն Մերկուչիոյի կերպարը շատ եմ սիրում, շատ վաղուց եմ խաղացել, բայց այն դերն է, որ հաճույքով կրկին կմարմնավորեի:

 Հետաքրքիր կլինի լսել սերը քո մեկնաբանությամբ:

-Երբ անտարբեր չես քեզ շրջապատող իրականության նկատմամբ, սերը չգիտի նեղացնել:

Գտե՞լ ես քո սերը:

-Դեռ ոչ: Կյանքիս ընթացքում հասցրել եմ միայն կորցնել, դեռ չեմ գտել:

Կա՞ մի բան, որից կամ ումից վախենում ես:

-Օձերից եմ վախենում` անկախ նրանից դրանք մարդու՞ կերպարանք ունեն, թե՞ կենդանու:

Ըստ քեզ, ո՞րն է քո կյանքի ամենակարևոր ձեռքբերումը:

-Վերստին ծնունդը, որն իմ շնորհիվ չէ, այլ` Հիսուս Քրիստոսի:

Եթե հնարավոր լիներ հետ տալ ժամանակները,   քո ապրած ժամանակի ո՞ր շրջանը կփոխեիր կամ ինչպե՞ս կապրեիր:

-Միանշանակ կա ինչ-որ մի բան, որ կուզեի այլ կերպ անել, բայց միևնույն ժամանակ հասկանում եմ, որ պատահական ոչինչ չի եղել. պատահականությունների չեմ հավատում, հետևաբար ինչ էլ որ եղել է, ուրեմն  պետք է լիներ…

Իսկ վերջում Արսենը ասաց, որ նոր  տեսահոլովակ է նկարահանել «Դու, դու, դու» երգի հիման վրա: Այն շուտով պատրաստ կլինի: Առաջիկայում  նրա մասնակցությամբ սպասվում են նոր դերեր թատրոնում և ֆիլմերում, և ինչպես նա է ասում`«պարապ չի մնում»:

Մարինե Հակոբյան